Download audio file (angschtaschrecken109.mp3)
mp3 download

Leider ass Angscht a Schrecken nach keng Fernsehserie mat milliounenschwéierem Budget an glecklecherweis ged et keen Storyarc. Waat héi reportéiert ged, sinn eben déi Saachen, déi esou passéiren. Géint een milliouneschwéiere Budget hätt ech trotzdem naischt. Ech wéißt ziemlech genee, wéi ech en uleen géif. Nämlech an Audio-Equipement an Spezialeffekter fir d’real Welt. Dir wesst secherlech, waat domadder gemengt ass.

Zereck op Wien. Wéi déi meescht vu mengen Nolauschterenden secherlech wessen, ass Wien eng enorm grouss Stadt an där d’Liewen pulséiert. Baal wéi New York schléift Wien baal nie. Awer och nemmen baal.

Ech hunn oft een ziemlech onregelméissegen Liewens- a Schlofrythmus, sou daat ech dacks ob sinn, wann aaner Leit schlofen. Aanerersaits zwengt mech meng Professioun als Gonzojournalist, dach mol zu „normalen“ Zaiten ennerwee ze sinn, sou daat ech dann och heinsdo mol um zwou Auer moies erem heem well. Well den Daach ustrengend waar oder sou.

An esou een Daach gouf et delescht och. Et waar eppes rondrem zwou Auer moies an ech waar no engem eiwegen Gespreich bei Téi an enger Kichen bereed, fir heem ze goen. Ech sinn de Wee nach eng Kéier duerch gaangen, well esou kenneg sinn ech zu Wien dann awer nach net. Fir dann mat engem Kichelschen bewaffnet an de Lift ze klammen. Et waar een vun denen almoudege Lifter, déi ob all Stack eng Dier mat Fenster hunn, plus eng Dier an der Kabin, déi normal zougeht. Ech hunn gehofft, ech géif net laanscht eng Mordszen fueren an misst dann em mai Liewen laafen, well de Märder mech als Zeihen net gebrauche kéint.

Angscht a Schrecken sinn wahrscheinlech och mat dem Lift gefuer.

Komesch, wéi verschidden Saachen engem Angscht maache kennen, just well een den falschen Gedanken zu der falscher Zait haat. Mä esou Saachen passéiren dach relativ dacks. Mir op manst.

Ech also raus aus dem Haus, mol endlech e een Steck Kichelschen ofgebass an hu probéiert meiglechst séier Richtung Westbahnhof ze goen, fir do de Nuetsbus ze kréien.

Wien ass iwregens voll mat komeschen Wett-Spelunken, an denen een ennerhalb vun e puer Minuten all seng Souen an déi vum Noper verspille kann. Ech si laanscht esou een Etablissement getreppelt. „GRATIS W-LAN“ stoung do. Ech duecht: „Hmm, du kéins jo lo am Fong dai Netbook…“ Merde. Ech haat meng Posch vergiess.

Also emgedreint. Een Moment laang hunn ech mech gefroot, bei waat fir enger Schell ech lo misst schellen. Zum Gleck ass graad een Mann rauskomm, den mech immens komesch gekuckt huet, mir d’Dir awer opgehaalen huet. Wahrscheinlech géif hien lo an déi Wett-Spelunk um Eck goen an do all seng Souen an déi vu senger Nopesch verspillen.

Ech also erem an den onheemlechen Lift, emmer nach mam Kichelschen an der Hand. Zum Gleck waar déi Persoun, déi ech besicht haat, nach net am Bett a konnt mir nach opmaachen a mir meng Posch aushändegen.
Nach eng Kéier mam Lift erof. Des Kéier hunn ech probéiert, mech ob positiv Saachen ze konzentréiren, fir net erem irgendwelch Gedanken un Bludd, Gemetzel an zoufälleg verdeelt Getraips ze hunn. Ech hunn daat lescht Steck vu mengem Kichelschen giess an sinn ziemlech séier eraus gaangen.

Déi ganz Emgéigend waar ziemlech lusch. Net nemmen déi obskur Wettspelunken, mä den ganzen Quartier mat senger komescher Meschung aus Heichglanzjugendherbergen, dreckegen Cafén an Wannabe-Akaafsstrossegeschäfter. Zousätzlech war ech mat de Wierder „Wann der eppes ugebuede ged, so nee.“ gewarnt ginn. Woufir, wosst ech net genee.

Gouf et hei an der Geigend eng Usammlung vun Drogenverreckten an Dealerinnen, déi mech mat hiren Produiten belästege géifen? Oder huet meng elo schloofend Bekanntschaft eppes nach méi schlemmes an ekleges gemengt?

Angscht a Schrecken hunn sech erem gemellt. Ech si méi séier gaangen an hu probéiert, mech esou genee wéi méiglech un den beschriwene Wee ze haalen. Nët, daat ech nach géing méi laang wéi néideg duerch déi onheemlech Géigend héi misst trëllen.

Irgendwann hunn ech de Westbahnhof ereecht. Um Arret stoung schon een Bus, deen awer net gefuer ass. Donierwt stoung ee Grupp vu Leit, déi sech op Englesch ennerhaalen hunn. Oder eischter op Amerikanesch. D’Welt ass kleng, well d’Mamm vun der enger Persoun waar mol mat dem berühmten Skileefer Esouanesou zesummen, an deen kennt natirlech all Mënsch an den USA.

Ech hu mir d’Fro gestallt, ob déi Leit wirklech esou haard geschwaat hunn oder op meng Wahrnehmung, déi jo momentan virun allem Daitsch oder Eisterraischesch héirt, just op daat daach relativ ongewinnt Amerikanesch méi empfindlech reagéiert huet.
Irgendwann ass de Bus dunn komm. Komescherweis méi fréih, wéi et um Horaire stoung, mä dorobber kann een sech jo souwiesou net oft verlossen, wéi ech als Gonzojournalist jo wosst.

Den Nuetbus ass meeschtens iwerfellt, besonnesch op Strecken wéi déi rondrem den Gürtel, déi grouss Schnellstross duerch ganz Wien, déi déi bannescht Bezierker vun den bausseschten trennt. Am Daach fiert d’Ubahn direkt een Deel vum Gürtel, an déi ass schon oft iwerfellt. Wann elo also an der Nuecht Busser op esou enger Streck fueren, déi esou vill Verbindungspunkten no bannen an no baussen hunn, ass et normal, daat déi total iwerfellt sinn. De Nuetsbus N6 ass genee esou eng chronesch iwerfellten Linn.

Mir alleguerten brauchen e bessi Léift, Wärmt an menschlecht Beineen. Heinsdo ass et awer vill ze vill. An dem Bus waar daat esou. Mat verschiddenen Leit brauch ech net onbedengt eng Kuschelronn, virun allem net, wann déi fuerchtbar voll sinn.

Nirwt mengen Amerikannerinnen, déi sech iwert déi wéider Owendgestaltung ennerhaalen hunn, waaren och nach vill aaner Leit am Bus. Zwee Männer mettleren Alters hunn sech duerch besonnesch geeschtraisch Kommentaren hervirgedo hunn.

Et versteet een kaum, wéi sech Leit doriwer beschwéire kennen, daat iwer Twitter, Facebook an esou wéider ze vill Informatiounen vun sech prais géife ginn, wann sech am Bus Léit haard iwert hier Geschlechtsdeeler an hiren Harndrang ennerhaalen.
„Na, wenn du wüsstest, was mein kleiner Mathias gerade denkt!“
– „Der will raus?“
„Der schreit: „Hiiiilfeeee, ich will rauuuus!“
Angscht a Schrecken.

D’Amerikannerinnen waaren dann erem zimlech haard, hunn vun hirer Heemscht geziehlt an sech ausgetosch. Normalt Gespreich, just e besseli haard. D’Wiener sinn jo leiwer roueg am öffentlechen Transport. Meeschtens esou roueg wéi wa graad irgendeen gestuerwe wier. Dacks féiert daat dozou, daat verschidde Leit immens opfaalen. Meng zwee Helden hunn sech, nodeems d’Amerikannerinnen iwert North Dakota geschwaat hunn, erem zu Wuert gelallt:
„Wo liegt eigentlich North Dakota?“
„Na nördlich von South Dakota!“
Hilarité génerale ennert dem 2-Persounen-Fuesgrupp.
Angscht a Schrecken heich zwee.

Firwaat hunn déi Vollerten iwert hier Genitalien geschwaat? Waat sollten all déi lusch Wettspelunken? Wiesou huet deen Lift esou onheemlech gewierkt? Firwaat ged et keen Milliounebudget fir Angscht a Schrecken?Wiesou waar main Kischelschen esou séier giess gewierscht? Wiesou waar et héi am Bus esou voll? Waat waar „Mathias“ fir een Numm fir een Penis? A virun allem: Wou lait North Dakota wierklech?

Zum Gleck waar de Bus schon beim AKH.
D’Flucht huet net méi laang op sech waarde geloss.

Download audio file (angschtaschrecken38web.mp3)
mp3 download Angscht a Schrecken op engem Nometten, wou ech eigentlech just Bicher kaafen wollt

Eischtens: WIESOU? Nee, ganz eierlech, wiesou em alles an der Welt?
Zweetens: Wann anscheinend just nach sou Bildbänn verkaaft gin, wiesou hun mir net eng ähnlech Comic-Kultur wéi eis belsch an japanesch Noperen?
Drettens: Wiesou soll en an esou en Buttek erangoen? Just, well ech hoffen, daat ech irgendwou an engem stepsegen Eck wou nach Bicher ouni Heichglanzfotoen aus dem Heißluftballon stinn, en Buch fannen, daat mir gefaalen kéint?

Ech kann schon verstoen, wiesou vill Leit einfach just nach am Internet bestellen. Dobai kennt nach déi onheemlech Freed, en Paack mat der Post ze kreien.

Daat ass dach eppes, waat einfach nemmen immens flott ass. An un sou wonnerbaar Feierdeeg wéi Gebuertsdaag, Chreschtdaag oder Ouschteren erennert. Mat dem klengen Ennerscheed, daat en des Keier de Paack selwer bezuehlt huet an den Internethändler normalerweis op brongen bellege Kartron setzt amplaatz op blenkege Cadeauxspabeier, den an alle méiglechen Faarwen liicht.

Ech waar also mat enger Frendin ennerwee fir Bicher anzekaafen. Daat waar mol eng Keier eppes aneschteres wéi emmer déi nach emmer brennend Hell vun Kleedergeschäfter mat hiren klengen, waissen Kessen an den Bikinien. Firdeischt hun mir allerdengs nach missen an en speziellen chineseschen Buttek eppes kaafen goen. Ok, hun ech mir geduercht, daat wärt lo bestemmt irgendeppes deck extraes sin, waat et soss neirens ged. Ausserem waar ech gespaant, den Buttek ze gesin. Mir sin jo weltoppen an sou weider.

Wéi mir an dem Buttek waaren, ass mir opgefaal, daat ech schon eng Keier an engem Asia-Buttek waar. Daat waar zu Köln gewierscht an et waar deemols relativ stresseg. An et huet irgendwéi genausou ausgesin. Wéi eben en klengen Supermarche oder eng Epicerie ausgesait, déi net d
Suen huet, fir alles vun den eemolegen Liichtkenschtler vun der Bühnenshow vun Pink Floyd ausliichten ze lossen.
Mat dem Ennerscheed, daat en héi amplaatz vun Barillanudelen ongefeiher eng Millioun verschidden asiatesch Nuddelen ungebueden kritt. Daat, waat huet missten kaaft gin, waar irwregens Wasabi. Wasabi ass daat grengt, daat beim Sushi dobai ass. Kritt en mettlerweil an all Supermarché. Oh.

No der Aventure sin ech also an en Bus gelotzt gin an dunn sin mir Richtung Biicherbuttik gaangen. Och den, den mir eis erausgesicht haaten, haat schéin faarweg Heichglanzbillerbicher iwer den zweeten Weltkrich an eis Kinnegsfamill, déi jo eigentlech eng Großherzogsfamill ass, an der Fenster. Mir sin trotzdem erangaangen, well et an esou engem groussen Bicherbuttek net NEMMEN Heichglanzbillerbicher gin konnt. Irgendwou an engem stepsegen Eck geif et secher e puer gudd Bicher gin, déi net zu 97 Prozent aus Biller geifen bestoen oder vun Leit wéi Stephen King oder Dan Brown geschriwen wieren. Vlaischt irgendwou hannert enger konschtvoller Pyramid aus Harry Potter-en.

Mir dann och sou Bicher fonnt. Am Keller. Allerdengs waar do keen stepsegen Eck, mee all Regal waar vum eemolegen Liichtkenschtler vun den Bühnenshowen vun Pink Floyd ausgeliicht gin. Ech hun mech alt gefroot, ob nach nie en Buch Feier gefaangen hätt, well emmerhin waar et guer net méi esou kaal an denen Regaler.

Ausserdem huet am Hannergrond dauernd en Telefon geschellt, den en extrem nervegen Klingelton haat. Daat huet mech bei der Auswihel vun Bicher ziemlech gesteiert. Virun allem huet en guer net opgehaal mat schellen an et ass och nie en drop gaangen. Vlaischt waar daat ganzt och just en Attrap, fir d’Client zum schnellen Kaaf ze bewegen. Wann en ennert dem permanenten Stress vun akustescher Belästegung steht, keeft en vlaischt just en Buch, fir schnell erem aus dem Buttek erauszekommen.

Op deser Plaatz sin ech lo versiicht vun Moustiquen ze zielen. Ech gin net oft gepickt, mee an leschter Zait komescherweis emmer op den Fouss. Ech hun lo, also beim Schreiwen, genau 2 Piquren op mengem Fouss. Ech fannen daat extrem onpraktesch. Et kann en sech um Fouss net gudd kratzen an et deet wéi wann en treppelt. Mee daat huet un sech naischt mam Bicherkaaf ze din.

Mir hun eis also no méi oder manner vill hin an hier fir Biicher entscheed gehaat, hun bezuehlt an sin gaangen. Dh. Ech sin erem an en Bus gelotzt gin an mir sin domadder bei en Comic- an Mangabuttek gefuer. Den Problem waar: Mir wossten allen zwee net genee, wou mir missten erausklammen. Un sech ass daat keng sou grous Affair, wann en bis an der Stross ass, kann en un sech jo och am Noutfall e bessi laafen. Meng Begleedung huet mir also gesoot, ech soll no engem Solarium Auschau haalen. Ech hun keen Solarium gesin. Ech hun och soss naischt gesin, waat irgendwéi „giel“ waar.
Meng Begleedung huet einfach mol op „stop“ gedreckt, den Bus ass stoenbliwen, mee mir waaren net richteg. Angscht a Schrecken. Zum Gleck ass irgendeen aaneren erausgeklommen an mir hun net missen erausklammen. Well et gelt jo d’ Gesetz: wann en dreckt, muss en erausklammen. Angscht a Schrecken waaren och an desem Bus, mee glecklecherweis waar déi nächst Haltestell eis.

Mir sin iwert Stross gelaaf an dun an den Buttek, wou naischt beonnesches geschidd ass. Daat enzegt, waat do fir Angscht a Schrecken gesuergt huet, waar den Fakt, daat do Regaler waaren, déi en normalen Mensch net ouni Leeder ereeschen konnt. Et huet en also op eng peinlech Art an Weis missen no enger Leeder froen, fir kennen un déi Bicher ze kommen oder iwerhaat mol ze liesen, waat do geif stoen. Wann en iwerhaat naischt vun dem Regal uwen wollt, waar en e bessi domm drun an peinlech blaméiert. Ech hun mir virgestallt, waat geif passéiren, wann en vun der wackeleger Leeder geif faalen. Wahrscheinlech geif en ennert engem Koup vun schwarz-waiss bedreckten japaneschen Mangaen begruwen gin an keint mat dem leschten Otemzuch nach en Sait liesen, mee daat natirlech vun riets no lenks an net vun lenks no riets, wéi mir daat gewinnt sin.

Zum Gleck sin mir relativ seier aus dem Buttek erem aus, mee Angscht a Schrecken sin mir natirlech nokomm. Mir sollten dunn en Kolleg vun menger Begleedung besichen goen. Schon no den Telfonater, déi ech jo zwangsläufeg hun missen matkreien, waar ech net méi esou secher, ob daat onbedengt esou gudd wier. Mir hun de Bus geholl an durno gouf et fir mech keen zereck méi.

Wou geif ech landen? An engem geheihem Drogenlabor irgendwou an der Brousse? Oder bei irgendwelchen komeschen Leit doheem, déi vlaischt naischt mat Drogen ze din haaten, mee trotzdem Angscht a Schrecken geifen ausleisen? Ech haat d’Situatioun net méi enner Kontroll, an daat huet mir net gefaal. De Bus huet mech einfach dohinner bruecht, an ech konnt naischt aaneres méi maachen, wéi matzegoen an drop ze hoffen, daat et net all ze schlemm geif gin.

Et ass dun och net wirklech schlemm gin, obwuehl Angscht a Schrecken meng permanent Begleedung waaren. Firwaat haat den Jong eng roud Luucht an senger Stuff, sou daat et ausgesin huet wéi en engem Puff? Waat sollt den komeschen Film, den zwaar gelaaf ass, den awer keen gekuckt huet? Firwaat huet hien andauernd drai Sproochen matneen geschwaat? Angscht a Schrecken haaten mech. Daat enzegt, waat elo nach bliwen ass, waar d’Flucht mat engem babybloen Auto.