Ech souz zu dem Zweck mat genannten Kontakter op enger Terasse vun engem Café onwäit vum Helleg-Geescht Plateau. Mir hunn op eist Zesummentreffen no esou laanger Zäit geprost an allerlee Geschichten erzielt. Esou, wéi een dat eben esou mëscht.

Download audio file (angschtaschrecken117.mp3)
mp3 download

Dat ass eng angenehm Säit um Jetsetterliewen, et kann een dacks „REUNION“ féieren. Interessant dorunner, Leit net all gudden Daag ze gesinn ass och, dat een sech dann eppes ze zielen huet. Virausgesaat, et huet een net schon all Blödsinn op soziale Netzwierker wéi Facebook un déi onintresséiert Ëffentlechkeet posaunt.

Ech si net per se géint sozial Netzwierker. Ech benotzen selwer immens vill vun deenen Siten, sinn dacks op Facebook, twitteren relativ vill an hu scho gebloggt, do wosste vill Leit nach net, wat een Modem wier. Trotzdem hunn ech Leit eppes ze zielen, wëll ech net all Kéiers en Message schreiwen, wann ech op d’Toilett ginn. Am Fong schreiwen ech just dann Messagen iwwert d’final Phas vu menger Verdauung, wann dat op der Toilett vun engem Heichgeschwindegkeetszuch geschitt.

Zum Gléck souz ech mat Leit zesummen, déi genee esou een verstännegen Emgang mam Internet wéi ech hunn. Villäicht sinn se esouguer nach e bëssen méi verstänneg an schreiwen näischt, wann se bei 250 km an der Stonn schäissen.

Iergendwann ass an engem Haus um Helleg-Geescht Plateau Kaméidi komm. Oder éischter: vun der Terasse vun dem Haus ass Kaméidi komm. Mir hu net laang gebraucht fir eng heterosexuell Koppel, déi sech allem Uschäin no zimlech gären haten. Esou koum et, dat den Typ säin Hiem ausgedoen huet. Oder éischter: En krut et ausgedoen. Ech weess net, ob si sech bewosst waren, dat se géifen beobacht ginn.
Angscht a Schrecken sinn kuerz opgeflaamt. Wann een eng Terasse um 5. Stack vun engem Appartementshaus an der Uewerstad huet, rechent een dann net domadder, dat Leit kéinten rop kucken, während een selwer mam Virspill beschäftegt ass?

Et sollt alles nach e bëssi méi louche kommen.
De Kaméidi ass méi haart ginn. Leit hu Kreesch gedo, aaner Leit erop geruff an mat schicken Cocktailglieser gewenkt.
Dat do war keen Koitus am Fräien, mä eng Party. Mat wahrscheinlech Koitus am Fräien. An wéi et ausgesinn huet, waare net zwou Persoun dorunner bedeelegt.

Nirft mir hunn d’Leit iwwer Sex mat Vampiren sinnéiert. Ech froe mech jo, wiesou esou seelen iwwert Sex mat Werwëllef riets gett. Ech wees jo net, mä dat stellen ech mir e bessen méi interessant fir. Also, besonnesch fir Leit, déi Schwellkierper an domadder Blutt bei hirem Akt interessant fannen. An dat sinn der jo awer net wéineg.

Elo hunn d’Leit vum Balkon ugefaangen, d’ Passanten ënnert hinnen ze ruffen. Wahrscheinlech hunn se Obszönitéiten an ironesch Aluedungen gebläert.
Mech huet zu dem Zäitpunkt gewonnert, dat nach keen vun der halwer Millioun Blockwarten aus dem Grand-Duché d’Police geruff hat. Villäicht war awer grad Tour de France an Léit déi 5000 Kalorien am Daag verbrennen an déi natierlech just a Form vu Nuddelen an Banannen zou sech huelen AN och nach zoufällegerweis aus Lëtzebuerg kommen hunn irgendwéi gewonnen oder esou eppes.

Angscht a Schrecken hate mech. War ech mëttlerweil schon esou prüd, dat mech e puer hallefplakeg Leit ofgeschreckt hunn? Oder waar et den blannen Hedonismus, deen déi Gestalten an hirer haarder an vulgärer Art a Weis propagéiert hunn? Wat war esou faszinéierend un Sex mat Vampiren?
A virun allem: Wosst de Luc Frieden, wat net wäit vu sengem ehemolegen Büro géif passéieren?

Dat eenzegt, wat elo nach gehollef huet war eng Glace iesse goen …

Download audio file (angschtaschrecken114.mp3)
mp3 download 15,4 mb

Mech stéiert jo éischter den Fussball, dem ech mech kaum entzéie kann. D’Internet ass voll domadder, an kaum een Gespréich kennt ouni eng Remarque iwwert een „absolut gaile Goal“ aus. Sécherlech een Grond fir ze flüchten, mä ech fäerten, Wien ass nach eng relativ harmlos Plaz wat Futtballwahnsinn ugeet.

An esou hunn ech mech mat vill Nostalgie vun engem Semesterofschlosspicknick zu dem nächste Fest gehetzt, hunn ville Leit Äddi gesot, mat deenen ech eigentlech nach gären an Rou geschwat hätt. Ech géif mir bal eng obligatoresch Woch Vakanzenufang zu Wien fir all Studéirend wënschen. An esou war ech dann och deslescht op eng Party agelueden, déi saisonal passend ënnert dem Motto „Good-Bye“ stoung.

Et war Owes, d’Sonn ass lues awer sécher ënnergaangen an ech wosst, wéi ech misst goen. Ob mannst ongeféier. Et gouf elo keng Excuse méi, fir net ze goen. Ech hunn also kéimend meng lescht Dous Béier aus dem Frigo geholl an hu mech op de Wee gemaach.

Esou een Spadséiergang duerch Wien ass ëmmer eng interessant Saach. An sief et nëmme wéinst de Strossenimm. D’Altmüttergasse ass nieft der „Blaastraße“ eng vu menge Favoritinnen. Ech sinn dann natierlech och laanscht een Café getrëppelt, virun deem Leit op der Terrasse souzen an Männerfussballweltmeeschterschaft gekuckt hunn. Ech hunn den, wéi den Max Goldt géif soen, „Zauber des Seitlich daran Vorbeigehens“ bewonnert an sinn an eng Niewegaass agebéit. Ob een mol: Gebläers. Ee klenge Moment duecht ech, et wier eppes schlëmmes geschitt an meng Fäegkeeten als Gonzojournalist a Weltretter wiere gefrot. Dunn ass mir kloer ginn, dat „just“ een Goal gefall war an d’Leit dofir esou wéi um Spiess gebrëllt hunn. Witzegen Detail: d’Kannerstëmmen ware mat e puer Sekonne Verzögerung ze héieren.

D’Schell vun dem Haus, an dem d’Party stattfanne sollt, huet komesch gesurrt. Esou een elektrescht Brummen, wéi wann iergendwou een Wackelkontakt an der Kommunikatiounsanlag dra wier. Ech drécken op d’Schell mat der Nummer Siwen. Ech héieren eppes, komesch, lusch Geräischer versteire mech, mä et ass keng mënschlech Stëmm ze héieren. Ech drécken nach emol. Eng Stëmm mellt sech, ech soe mäin Numm a ginn era gelooss.

D’M., wat d’Party organiséiert huet, huet eng grandios Wunneng. Dat éischt, wat ech gesinn, wéi ech erakommen, ass eng groussformateg Porno-Foto an enger gëllener Rumm. Ech hunn mech net getraut, ze froen, wat dat sollt. D’Wunneng selwer ass herrlech verfénkelt an um Gang hänke Fotoe vun iergendwelleche Protester aus den 1960er Joeren. D’M. mécht mir als alleréischt en Cocktail. Ech drénken een White Russian. Net, well ech déi esou gären hunn, mä well ech nach ni een gedronk hunn. An ech froe mech, wéi vill Leit, déi all hir Kollegen ëmmer „Dudes“ nennen, scho mol een gedronk hunn. Mëllech oder Rahm, Wodka, Kahlúa. Ee gudde Start fir een extrem komeschen Owend.

Ech hu mech an d’Stuff bei déi aner Partygäscht gesat, vun deenen déi meescht dobäi waren, Twister ze spillen. Stomm ass de Fernseh mat Futtball gelaf, dee keen esou wierklech interesséiert huet. Wisou awer just dräi Hären Twister gespillt hunn, hunn ech net verstanen. Och net, wisou schon zu engem Zäitpunkt, wou nach keen esou richteg voll war. Interessant och d’Geschicht vun Twister. Et ass an den USA eréischt populär ginn, nodeems et an enger Fernsehsendung gewise ginn ass. Duerno ass d’Firma, déi Twister produzéiert huet, vun hire Konkurrente beschëllegt ginn, „Sex an enger Këscht“ ze verkafen. Wisou dat eng schlecht Saach sollt sinn, weess ech och net.

Et war schwiereg, an d’Gespréich ze kommen. Net, dat d’Leit net hätte wéilte schwätzen, mä anscheinend waren se alleguerten ze midd, fir laang an komplizéiert Diskussiounen ze féieren. Den Alkohol, mëttlerweil a Form vun Äerdbierbowle, huet natierlech dozou bäigedroen.
Angscht a Schrecke souze wahrscheinlech hannert mir. An hunn all Mënsch esou erféiert, dat keen sech getraut huet, eppes ze soen.

E kuerze Liichtbléck gouf et, wéi aus Konschtfell Bäert an Schnurresen ausgeschnidden an opgepecht gi sinn. Fir déi Leit, déi schon een Baart haten, gouf et Déirenouren. Ech hunn mir een laang geheegte Wonsch erfëllt an hunn Kaatzenouren opgesat. An hunn probéiert, eng eescht Minne dozou ze maachen. Contenance ass an esou Situatiounen oft een wichtege Charakterzuch.

Iergendwann si méi Leit komm an déi ganz Geschicht huet sech an d’Kiche verlagert. Wisou, konnt keen esou richteg erklären. D’Kiche war kleng, verfénkelt an et gouf net genuch Still. Trotzdem hunn sech d’Leit dohi gedréckt. Ech hunn am Ufank geduecht, et hätt iergendeppes mat illegalen Drogen ze dinn, mä dem war net esou.

Komescherweis huet sech déi ganz Party op e puer Zëmmer verdeelt. Et gouf also 2,3 Privatpartyen an verschiddene Kummeren. Wat net wierklech dozou bäigedroen huet, dat et zu méi Kommunikatioun komm ass.

Ech hu mech mat enger Persoun iwwer Südfrankräich ënnerhalen. Wat ech no e puer Méint an Éisterräich séier gemierkt hunn: Iwwer Frankräich schwätze kennt gutt un. Besonnesch iwwer Südfrankräich schwätzen. Nach besser ass: Driwwer schwäermen an geleeëntlech e puer franséisch Ausdréck benotzen an se direkt drop erklären. De selwechten Effekt kritt een och, wann ee ganz niewebäi bemierkt, dat een Lëtzebuerger ass. Well dat awer mat der Zäit langweileg gëtt, schwäermen ech och ganz gären iwwert Südfrankräich.

Mir sinn erëm an d’Stuff geplënnert an hunn do zu puer Leit een Spill gespillt, dat wéi Scrabble mat Wierfele funktionéiert huet. Leider war et net hallef esou spannend wéi Scrabble an dofir awer dräimol méi komplizéiert. Et war wahrscheinlech och eng immens gutt Idee, dat ganzt ze spillen, wéi een Joint rondrëm gaangen ass.
Ech huelen net un, dat d’Konkurrenz der Hierstellerin virgeworf huet, „Angscht a Schrecken an enger Këscht“ ze verkafen. Se hätt awer Recht gehat.

Ech hunn op een Mol op d’Toilett missen. Do houng en Portrait vum Pobst Jang-Pol den Zweeten. Angscht a Schrecken um Schäisshaus.
Wéi ech erëm vun der Toilett raus komm sinn – ech schwieren, ech war net méi wéi fënnef Minutten drop, war d’Wunneng eidel. An der Stuff war kee méi, am Gaang stounge keng Leit méi an och soss war kee méi ze gesinn. Eng midd Persoun huet mir erklärt, d’Gaschtgeberin wier schlofe gaang. Angscht a Schrecken hate mech. Wou waren d’Leit all hin? Wisou war jiddereen an jiddereent elo scho gaangen? An virun allem: Wien huet dat schrecklecht Wierfelspill erfonnt?

Ech hunn mir en grousse Grapp Kiischtekamelle gegraff an si geflücht. Op mannst war d’Temperatur elo eenegermoossen agreabel. D’Schell an den Kommunikatiounsapparat deen drun ugeschloss war, huet nach ëmmer komesch gebrummt.

Download audio file (angschtaschrecken104.mp3)
download mp3 Angscht a Schrecken ob enger Hausaweiungsparty irgendwou am reenege Süden vum Land

Mä waat mescht een bei Gebaier? Ech hunn ee Gebai kannt, daat huet nach een Joer nodeem et färdeg gebaut waar, no Faarw gestonk. Net nemmen bannen, mä och baussen. Et huet een gemengt, daat Gebai géif Faarwgeroch schweesen. An et si jo net nemmen néi Gebaier, déi richen. Et geht schon duer, daat een den Geroch vum Virbesetzer einfach schon erem fort ass, daat Haiser ufänken no Faarw an Mazout ze richen.
Et ged wahrscheinlech just eng enzeg Method, fir een Haus esou richen ze lossen, daat et seng Bewunner net stéiert: eng Hausaweiungsparty, op englesch och „House warming party“ genannt. An ob genee esou eppes waat ech agelueden. An déi Party sollt am reenege Süden vum Land iwwert Bühn goen.

Meteorologesch gebild an/oder tréi Nolauschter wëssen, daat den Süden vum Land de schwaarze Fleck op der Klimakaart ass. Well soen: Et ass do méi kaal an et reent méi oft wéi am Recht vum Land. Daat ass elo keen Minettebashing, mä einfach a simpel wëssenschaftlech Fakten, baséirend op empireschen Donnéen. Ech kann och naischt dovir.

Well ech numol net am reenege Süden wunnen, ass et fir mech emmer eng hallew Weltrees fir an méi oder manner grous Uertschaften an eben dem Süden ze kommen. An ech maachen, Ökohellegenschain verpflichtet, esou Reesen emmer mam Zuch. Wat och meeschtens ganz gudd klappt, och wann ech leider soen muss, daat meng Kentniss vun Zuchstrecken am Süden vum Land net esou gudd ass. Normalerweis ginn d’Uertschaften jo iwer Lautspriecher ugekennegt an während dem Daach gesait een jo och d’Schelder an d’Garen. Mä wann et dann daischter ass, keng Lautspriecher an d’Displayen einfach schwaarz bleiwen, da kommen Angscht a Schrecken op.

Ech wollt net graad aus Domheet irgendwou am postindustriellen Frankraich erausklammen, fir do vun enger Grupp letzebuergescher Drogenverreckter vergewaltegt ze ginn.
Ech hunn also telefonéiert, just fir vun engem Mann am Zuch gesoot ze kreien, daat déi Informatioun, déi ech um Telefon kruut, falsch waar. Daat ass de Problem, wann een Leit besiche geht, déi graad geplennert sinn. Déi kennen sech och nach net esou gudd aus.

Een Bleck no ennen bei d’Dir huet verroden, daat do en Vollert widdert d’Dir vum Zuch gepisst huet. Angscht a Schrecken. Herno luch de Mann um Teppech, deen sech lues a lues mat sengem Seesch vollgesuckelt huet. Mir hunn eng aaner Dir geholl, hunn eisen eidelen Sixpack Béier an d’Dreckskescht gehait an hunn d’ Instruktiounen op mengem Handy befollegt.

Verschidde Leit wärten sech lo wahrscheinlech virstellen, ech hätt esou een iPhone oder soss een komeschen Touchscreentralala aus der Täsch gezunn, hätt Google Maps opgemaach, d’Adress aginn , eng hallew Minut gewaard, an dann no all Schrett déi nächst Etapp ugeklickt, bis mir virun der Dir gestaanen hätten. Dem waar net esou. Ech haat meng Instruktiounen an besse manner wéi 160 Zeechen a konnt direkt lassgoen. Ech well net technikfeindlech eriwerkommen. Mä ech sinn eben e Frend vun einfachen, eleganten Léisungen.

Vir déi Leit, déi et net matkritt hunn: Ween an der Krise nach Souen haat an souwiesou irgendwann eng Kéier een Haus kaafe wollt, deen haat gudd dorunner, daat während der Krise ze maachen. Déi Banken, déi nach Souen haaten, waaren nämlech ganz gail drop, se och direkt erem lass ze ginn, well Zensen an secher Ulaagen an iwerhaapt, mir waare scho laang net méi am Casino. Des Lescht hunn ech een Artikel gelies, dee gemengt huet, Economie wier iwerhaapt keng Wessenschaft. Ech hunn daat interessant fonnt. Villaischt waar daat jo wierklech alles nemmen Humburg, genee wéi esou vill aaner Saachen, déi Leit als „Wessenschaft“ betruechten.

Eng Hausaweiungsparty also. Nach waaren net esou vill Leit do, mä daat sollt sech an denen nächsten Stonnen änneren. No engem relativ luesen Start ass et dunn irgendwann eppes ziessen ginn, waat den Alkoholkonsum an domadder och d’Stemmung gehuewen huet. Woubai ech net genee wees, ob d’Stemmung net och vilaischt den Alkoholkonsum gehuewen huet. Et ass schwéier.

Download audio file (angschtaschrecken84.mp3)
mp3 download Angscht a Schrecken op enger Party vun Studenten vun der Uni.lu

Ech wosst zwar, daat et eng Rescht vun „auslännesche“ Studenten géif
ginn, mee daat déi an hiren Studentenwunnheemer géifen Partyen
schmeissen, dorunner hunn ech nët emol geduercht. Fir mech waar d’Uni
emmer eppes ziemlech langweileges, wourunner daat witzegst d’Tshirten
mam Sproch „D’Uni.lu ass iwerhaat keng Uni“. Mee ech wosst nët, wéi
Onrecht ech domadder sollt hunn.

Ech waar also vun e puer Studenten op eng sougenannt „House“party
angelueden, waat naischt mat der Musekrichtung oder engem Dokter ze dinn
haat. Een Studentenwunnheem zu Bouneweg sollt d’Plaatz vun dem ganzen
Event sinn.
Bouneweeg , daat heescht fir mech Fixerstoff, Rotonden – an en relativ
aarmen an dreckegen Quartier. Domadder verbend een net onbedengt
Partystemmung. Eischter Angscht a Schrecken.

Ech hun mech also vun der Gare aus iwert déi grous Autosbreck Richtung
Bouneweeg gemaach. Do waar ech dann an der relativ blöder Laag, zwar eng
Hausnummer, mee awer keng Ahnung, wou daat genee sollt sinn, ze hunn.
Well ech schlauerweis och keng Handysnummer vun irgendengem haat, waar
ech also op mech alleng gestallt.

Wéi hunn d’Leit daat eigentlech fréiher gemaach? Vlaischt am Virraus
gefroot an sech eng Weebeschreiweung ginn geloss, amplaatz sech op
„Google Maps“ an sain eegent méi oder manner gudd Orientéierungsgefill
ze verlossen.

Waat soll den Gaiz hunn ech mir geduercht, du bass Gonzojournalist an du
hues eng Fläsch Rum dobai – waat kann do scho schief goen?

Natirlech sinn ech beim éischten Versuch glaat lanscht déi onscheinbar
Residence gelaaf. Zu Bouneweeg waaren déi meescht Fenstren schon
daischter. Keen Liewen héi, virun allem keng well Studentenparty.
Vlaischt géif „Houseparty“ an deem Fall jo heeschen, daat 5 Leit em een
Desch setzen an drenken géifen. Just daat ech daat Haus mat dem Desch
nach nët fonnt haat.

Nodeems ech eng Zait laang duerch Bouneweeg gegeschtert waar, hin an
zereck, hun ech vunn an engem daischteren Eck hannert engem Parking déi
ominös Résidence fonnt.

Vun dobaussen huet et immens roueg ausgesinn. Ech hun och nach e puer
Minuten no der Entree missen sichen. Wéi gesoot, et waar ziemlech bis
ganz daischter, esou daat déi Aufgab net déi einfachst waar. Angscht a
Schrecken sinn opkomm. Wiesou waar et an esou engem ongemittlen Quartier
emmer esou daischter?

Schlussendlech sinn ech dann awer eran komm an hunn heiren, daat schon
eng lass wier. Musek an Stemmen waaren ze héiren. Ausserdem hunn ech een
Deschtennisdesch gesinn.
Irgendwéi schengt daat eng Aart Naturgesetz ze sinn, daat iwerall wou
Jonker sinn, emmer direkt en Pingpongsdesch stoen muss. Ech wees mol
guer net, ob ech dem Pingpong esou eng grouss Popularitéit enner Jonken
attestéiren géif, mee vlaischt sinn ech jo och déi falsch Persoun dofir,
emmerhin fannen ech Kicker jo och langweileg, an daat ass deffinitiv
populär.

Vlaischt ass och graad eng Art Emschwong an den Gesellschaftsspiller bei
Jugendlechen ze beobachten. Waat virun e puer Joer nach den PingPong an
den Kicker den A an O vun der net-alkoholgesetzer Jugendennerhaalung,
esou schengen haut kierperlech weineger unstrengend Spiller wéi Poker an
den Mettelpunkt ze trieden. An enger Welt, déi all 2 Wochen duerch
irgendeng futtis Bank ennergeht, schengt Risikobereedschaft an
d’Fähegkeet, ze blöffen, eng Grous Valeur an der Gesellschaft vun muer
ze kréien.
Ech perséinlech liesen jo léiwer en Buch, ginn op en Konzert oder
trellen voller Drogen duerch eng Stadt an diskutéiren mat Leit. Mee daat
kann en jo och alles alleng maachen.

Ech sinn dunn an en Sall rankomm, den wahrscheinlech als eng Aart Kichen
an Openthaltsraum funktionéiert. Wéi esou vill Staatsgebaier haat och
dest en zweeten Plafonk aus Gipsplacken, wou d’Luuchten dran waaren. Déi
waaren mat transparenter rosa Folia iwerkliewt, esou daat den ganzen
Raum an en schummeregt rosaroud Liicht gekleed waar. Et huet e bessi
gewierkt wéi an engem Puff. Mat dem Ennerscheed daat eben Studenten an
keng Puffclientell op villen Fotoellen souzen an sech mat Wain, Conniag
an soss Spirituosen ofgefellt hunn.

Ech sinn vun Leit begreißt ginn an stoung relativ domm am Raum, well ech
iwerhaat keen kannt hun. Also hunn ech no mengen Gaschtgeber gefroot an
hun déi dunn och een Stack uwendriwer fonnt, wou ech mol direkt en Béier
ungebueden kruut, déi ech natirlech direkt geholl haat. D’Party wier
awer leider net esou den Renner, net immens vill Leit. Leider.

Angscht a Schrecken sinn opgesprongen an hun gejaut: “NET ESOU VILL LEIT?”
Waat soll daat dann wannechglift gewierscht sinn, wann net vill Leit? An virun allem: Wéi géif et an dem klengen Studentenwunnheem ausgesinn, wann do richteg vill Leit géifen optauchen? Vlaischt sollt ech virsichtshalber schon mol Otemloft an eidel Plastiksfläschen fellen an déi esou no wéi méiglech um Kierper droen, fir am Noutfall nach e bessi Loft ze kréien?

Mat der Fläsch Béier an der Hand sinn ech erem roof gaangen an sinn direkt mol irgendwelchen Leit virgestallt ginn.
Haut géif ech déi wahrscheinlech net méi erkennen, vun hirem Numm net emol ze schwätzen. Mee den Moment huet et wichteg geschengt, sech mat hinnen ze ennerhaalen. Virun allem well een sech mat denen meschten Leit héi op all Sproch ennerhaalen konnt, just net op Letztebuergesch. Am Laaf vum Owend sollt ech rausfannen, daat ech den enzegen Letzebuerger op der Party waar.
Vlaischt waar ech och den enzegen Letztebuerger, den je an desem Studentenwunnheem gewierscht waar!

Mee daat waar mir am Moment egal. Angscht a Schrecken waaren zwar definitiv op deser Party, mee je méi spéit den Owend ginn ass, emsou méi Leit sinn et ginn. Ech hunn den Rum ausgepackt, en mat bessi Cola gemescht an gedronk. Durno hunn ech meng hallew eidel Fläsch op den Desch gestallt, esou daat jiddereen sech servéiren konnt. Daat haat den Virdeel, daat ech keng eidel Fläsch hun missen mat heem schleefen an keen konnt soen, ech hätt naischt zu der Party beigedroen.

An esou ass et weider gaangen, den Rum ass dem Wain gewasch, d’Daitsch dem Franseischen, den Wain dem Coniac, d’Franzseisch dem Engleschen. Et gelt bei Friemsprochen jo souwiesou emmer d’Regel, daat, je méi voll een ass, esou besser kann een se schwätzen. Et sollt en just oppassen, net engem engleschsprochegem Mensch wellen ze erklären, daat Englesch eng Sproch ass, déi souwiesou nemmen am vollen Zoustand richteg artikuléiert kéint ginn. Net jiddereen huet den Witz verstaanden, an mir wessen alleguerten, an waat fir engem Land den Hooligan erfonnt ginn ass.

Irgendwann ass et dunn emmer méi an méi eidel ginn. Angscht a Schrecken sinn opkomm. Et waar ereischt drai Auer – an ech haat fest domadder gerechent, daat des Party esou laang géif goen, daat ech ouni Problemer den eischten Zuch fir zereck kéint huelen an net laang waarden misst.

Dem waar elo net esou. Wéi bis déi meescht Leit fort waaren, hunn sech déi eischt Wunnheembewunner un d’Botzen an Raumen gemaach
an mir ze verstoen ginn, daat ech elo am beschten sollt goen. Angscht a Schrecken sinn opkomm… Waat géif ech elo maachen? Wou géing ech op den Zuch waarden? An wiesou waar déi Party esou séier riwer?

Ech hunn mech mat e puer Leit op de Wee gemaach. Déi waaren Richtung Lampertzbierg ennerwee. Ech hunn beschloss sie bis op den Aldringer ze begleeden, fir dann ze kucken, waat ech géif maachen.

Et waar aiskaal an der Staadt, an de Niwel ass duerch d’Strossen gezunn, genee wéi Angscht a Schrecken duerch main Kieper gezunn ass. Ech hunn déi lescht Meldungen iwert erkaalten Strummerten rekapituléiert.
Meng zwee aal Bekannter haaten mech fest am Greff.

Waat géif mat mir passéiren? Wiesou sinn nie letztbuerger Studenten op denen Partyen gewierscht? Wou waar all den villen Alkohol hier komm? Ween waaren all déi komesch friemsprocheg Leit? An virun allem: Wiesou waar eng Studentenparty speistens um halwer 4 riwer?

Zum Gleck hun ech an menger Täsch en Schlessel gespirt, den mir op manst fir eng hallew Stonn eng waarm Zuflucht garantéiren géif…

Download audio file (angschtaschrecken34web.mp3)
mp3 download Angscht a Schrecken op enger Party no enger Anweihung

Ech hun allerdengs naischt vun all denen Saachen missen maachen. Bei eis gouf et just eng Anweihung fir déi néi. D’Scouten ennert ierch, happy birthday nirwebai, kennen daat ganzt secher als “Monté”. Et gin och sou Saachen an denen verschiddenen Studentenkreeser an zirkeln. Am Allgemengen muss en bei esou enger Anweihung eppes ernieregendes an ekleges maachen. Et ass quasi en rituellen Mobbing, fir daat en herno net méi gemobt ged. An natirlech fir daat déi aal Huesen all hiren Frust an Agressiounen ausliewen kennen an sech gudd ameséiren.

Et ged an deser Episode awer net em meng eegen Anweihung, déi schons Joeren zerecklait. Ech hun och net méi wirklech vill Erennerung dorunner. Ech wees, daat en Videofilm mat präkärem Material existeiert, mee och daat ass net furchtbaar schlemm. Emmerhin heescht daat just, daat eng Dokumentatioun op BBC iwer main Liewen weinstens e bessi interessant wier.

Déi Anweihung waar furchtbaar laang an déi ze humiléierend Leit hun mir ab dem Moment, wou naas an kaal waaren an et trotzdem nach ze laang gedauert huet, och e bessen Leed gedo. Awer nemmen e bessi. En Tipp awer nach un all déi Leit, déi esou eppes plangen: Wann dir sou maacht, wéi wann d’Leit en Goldfesch essen missten, an dir gidd hinnen Gelatinestecker amplaatz, dann hudd dir eng gudd Idee. Daat klappt emmer.

Nodeems während der Aweihung schon ziemlech vill Alkohol gefloss waar an demenspriechend verschidden Leit net wirklech bei der Saach. Also, si hun schon matgemaach, mee sie hun all déi schlemm Saachen net méi wirklech matkritt. Leit, déi sech géint 10 Auer an kaalt Wasser werfen, nodeems sie schons eng hallew Stonn gefruer hun, maachen mir Angscht. An daat waar den eischten Optrett vun mengen zwee Kollegen Angscht a Schrecken.

Et ass dun en Lagerfeier ungemaach gin, gegrillt gin, gedronk gin an nach méi gedronk gin. Ausserdem huet irgendeen Musek iwert sain Autoradio laafen geloss, waat zu dem Zaitpunkt awer nach erträglech waar. Esou en Lagerfeier ass eigentlech eppes gemittleches. Mee haut huet d’Stemmung esou no Alkohol an Rausch gericht, daat ech erwaard hun, den Toni an den Rastamann geifen all Moment mat engem obskuren Paak optauchen an sech nirwt mech setzen.

Grillen wann et daischter ass ass eppes tückeges. Et ass fir d’allereischt mol daischter. Daat heescht normalerweis, daat en net vill gesait an virun allem am Geigenliicht erkennt en quasi just Konturen. Lo ass awer de Problem daat alles, waat op engem Grill, bzw. iwert der Glouss vun engem Lagerfeier am Geigenliicht lait. Et erkennt en also net wirklech, op eppes lo gegrillt ass oder net. Freier huet en dofir wahrscheinlech einfach eng Fakel oder eng Lanter mat bei de Grill geholl an et huet en gesin, op den Thüringer oder den Fleeschersaatzprodukt an Würterschersform nach reih, schon gegrillt oder verkuehlt waar.
Mee haut liewen mir jo am Zaitalter vun der Kommunikation, der Desinformatioun an dem onstoppbarem technologeschen Fortschrett, waat virun allem dorunner erkennen ze ass, daat et mobil Telefonen ged. Haut mescht en sech net mat enger Lanter oder enger Fackel Luucht, mee et liicht en mat sengem Handy op de Grill. Natirlech gin et mettlerweil Handyen mat agebauten Täschenluuchten, mee den Durschnettsrondremdegrillsetzer huet esou eppes net an probeiert am bleechen Liicht vun sengem Display ze erkennen, wéi wait sain Gegrills dann elo ass. Angscht a Schrecken maachen sech breed.

Ech hun probéiert, mech der allgemenger Stemmung unzepassen an mech mat Alkohol e bessi ze betäuben. Daat huet allerdengs net wirklech geklappt. Ech hun den Alkohol mol nach net wirklech gespuert an de Recht vun denen Leit, déi et sech zum Ziel gesaat haaten, desen Owend meiglechst aus hiren Synapsen ze verbannen, waaren schon ziemlech ellen.

Et ass eng Aart Krisenstemmung opkomm. Speistens nodeems et dem eischten esou schlecht waar, daat en huet missen vun zwee Leit gestaipt gin an heemgefeuert gin ass, souzen Angscht a Schrecken och beim Grill. An daat verdächteg no bei mir.

Verschidden Leit hun Gesten gemaach, déi relativ geiferlech waaren. Wann en voll ass an net méi déi voll Kontroll iwert seng Motorik huet, sollt en am beschten wait wech vun engem Feier bleiwen. Op alle Fall sollt en NET, ech wiederhuelen, NET probéiren, ze grillen. Geiferlech Brandverletzungen an ellen Narben sin gemengerhand d’Folgen vun esou Versich. Ausserdem leissen esou Gesten Angscht a Schrecken bei Gonzojournalisten, déi zoufällegerweis och um Feier setzen, aus.

Während déi Besoff rondremgetorkelt sin an daat gemaach hun, waat Besoffener gemengerhand maachen, nämlech besoffen lallen an deelweis och sangen, hun sech méi niichter Leit nirwt mir iwer Astralwanderungen ennerhaalen an hun deelweis gefeierlech ofwiesend gewirkt. Och daat huet main Angscht a Schrecken-Pegel net graad berouegt.

Dun ass d’Musek vill méi haard gin an trotzdem net onbedengt besser. Ech perseinlech hun se relativ ziemlech absolut grausam fonnt. Natirlech kann en doriwer streiden, (Maachen ech och gären!) mee et waar eppes aneschteres, waat nach méi schlemm waar. Jiddereen kennt den Phänomen, wann en Boxen esouwait opdreint, daat d’Musek just nach verzerrt ass. Dat hei waar esou. Just ongefeier nach 100 mol méi schlemm.
Daat Geraisch, waat aus denen Boxen komm ass, waar eng enzeg Verzerrung.

Dun sin och nach obskur Gestalten opgetaucht, déi net wirklech eppes mat der ganzer Party ze din haaten, mee trotzdem mol einfach sou opgetaucht sin. Sie waaren och schons besoff an hun sech dementspriechend net besonnesch manneierlech beholl. Vlaischt huet daat och einfach mat den Leit ze din. Alkohol an aaner Drogen soll en net als Excuse fir alles huelen. En vun denen “Gescht” huet op alle Fall relativ haard gejaut an vun irgendeppes geziehlt, waat hien wahrscheinlech um Fernseh oder, an daat ass wahrscheinlech net besser, am Internet gesin huet. Vun Leit, déi mat Hamburger op aaner Leit scheissen. Daat en esou eppes furchtbaar genial fennt an geschaaten 5 Minuten doriwer blären muss, ass engersaits furchtbaar absurd, aanersaits huet et mir wirklech Angscht gemaach.

Angscht a Schrecken haaten mech. Ech wollt keng Alkohollaichen méi gesin, keng schlecht an verzerrt Musek méi heiren, net méi matkreien, wéi besoffen Leit déi naischt mat dem ganzen ze din haaten eppes iwer Leit, déi mat Hamburger op aaner Leit scheissen zielen, ech wollt net onbedengt nach vill iwer Astralwanderungen heiren.

Daat enzegt, waat elo nach bliwen ass, waar d’Flucht.

Download audio file (angschtaschrecken17web.mp3)
mp3 download Angscht a Schrecken op enger Versammlung fir eng komesch Party an enger hipper Boite

Mir hun also Jinglen realisiert an och gesoot, mir geifen ob dem Owend d’Moderation assureiren. Waat beides vlaischt en Fehler waar, well emmerhin huet déi ganz Saach elo schon fir eng geheireg Portioun Angscht a Schrecken gesuergt.

Mir sollten also ob eng Versammlung goen wou och allguerten déi aaner Partnern déi irgendeppes mat Jugend an Europa ze din, sin sollten. Dorems geht et nämlech bei der Party. Also net em d’Partnern, mee em Jugend an Europa.

Ganz esou jugendlech huet déi Unsammlung Leit awer net ausgesin. Et klengt vlaischt bessi drastesch, mee ech sin mir virkomm wéi wann mir den den Altersduerchnschnett em ob manst 5 Joer gesenkt hätten.

Daat sollt en awer kengem zum Virworf maachen. Ech perseinlech fannen et eben just Schued, wann en eppes fir Jugendlecher mescht an déi ganzen Zait net emol en Jugendlechen freet, ob him daat geif gefaalen. Mir ass et och esou virkomm wéi wann déi hipp Boite an den Datum just am Ufank vun der Vakanz an den Aan vun den Organisteuren den Status vum Stein der Weisen hätten.
Waat elo naischt mam Harry Potter ze din huet. An och naischt mam Rastamann. Ween net wees, waat den Stein der Weisen ass, soll gefällegst eng Recherche maachen.

Mir souzen also an engem Versammlungsraum an hun eis eng Projektioun vun den Reimlechkeeten vun der hipper Bar ungekuckt an kruuten erklärt wou sech waat geif befannen. Daat waar naischt neies, virun ziemlech genee engem Mount haaten mir daat selwescht schon eng Keier kritt, déi Keier allerdengs op Pabeier.
Et huet allerdengs esou ausgesin, wéi wann mir déi enzeg gewierscht wieren.
D’Erklärungen zu dem Thema sin net wirklech virungaangen. Ech hun mech gefillt wéi wann alles emmer an emmer erem widderholl geif gin, just well irgendeen aus der virleschter Reih eppes net verstaanen haat.

Irgendwann ass d’Diskusioun dann em Brauereisdescher gaangen. Déi meescht Leit kennen Brauereisdescher. Daat sin orange Descher, net immens heich an och net furchtbaar bequem. Mee se sin zesummenklappbar an kennen liicht transporteiert gin. Ausserdem rubust. Fir eng komesch Party an enger hipper Boite mat honnerte vun Leit ass daat also genee daat richtegt.
Virun allem, wann et em en Stand geht.

Op normal Brauereisdescher kann en och ouni Problem en Laptop platzeiren an trotzdem huet en nach genuch Plaatz fir aaner Saachen.

Déi ganz Versammlung huet gewierkt wéi eng Aart Zeremonie Mee et waar eng ziemlech konfus Zeremonie, déi keen geregelten Oflaaf haat. Engersaits sin wichteg Detailer einfach net gesoot gin, ob der aanerer Sait ass minutenlaang iwer onwichteg Detailer wéi d’Greißt vun Brauereisdescher philosopheiert gin. Angscht a Schrecken waaren net nemmen do, mee si hun mech mat der voller Wucht getraff. Ech hun mir emmer méi oft d’Fro gestallt, wiesou ech an dem Raum zweschen denen aalen Leit, déi iwer Jugendlecher an hipp Boiten diskuteiert hun waar. An waat ech do geif maachen.
An ech hun staark ungeholl, daat den Toni seng Fanger do mat am Spill haat.

Irgendwann ass just nach d’Flucht bliwen.
D’Luucht ass ausgaangen, an do hun ech mech virdeischt mol op d’Toilett gemaach, wou ech mech verstoppt haat, bis deen Trubel eriwer waar.